Qarakilsə rayonunun Ağdü kəndi 1988-ci ilə qədər Azərbaycanlıların kompakt yaşadığı yaşayış məntəqəsi olmuşdur. 2000-ci ildə ərazidə olmuş tədqiqatçılar Ağdü kəndinin girəcəyində sol tərəfdə çox böyük bir müsəlman qəbirstanlığından xəbər veriblər.

2013-cü ildə kənddə olmuş bir səyahətçi tərəfindən 1271-ci ildə (miladi 1854) qoyulmuş və “Qulaməli ibn Mirzəağa” adlı bir şəxsin qəbrinin (Qəbr üzərində Quran ayələri (Kullu mən 'aleyhâ fân(in).. də həkk olunub) şəkli çəkilmişdir. Burada biz romb naxışları ilə bəzədilmiş, qabartma üsulu ilə əhəng daşı üzərində yonulmuş səliqəli baş daşını görürük.