2020-ci ildə blogger-səyyahlar tərəfindən paylaşılmış videodan da göründüyü kimi Gölkənd kəndinin tarixi müsəlman qəbirstanlığında yüzə yaxın baş daşı salamat qalmışdır. Burada üzərində lotus gülü ornamentləri olan Məcid Şəmil oğlunun (1893-1962) qəbrinin üzərində ərəbcə yazılara rast gəlinir. Kiril əlifbası ilə yazılmış “bu qəbrin sahibi” ifadəsi isə orta əsrlərə xas olan Azərbaycan qəbirləri üzərindəki ifadənin təkrarıdır. Şəmilova Əsli Məhəmməd qızının (1887-1971) qəbri üzərində onun oğlu Orucdan yadigar olduğu yazılmışdır. Ayaz Mustafa oğlu (ö.1971) isə sonradan rənglənmiş və çox güman zamanla yerə batmış sadə qəbirdə uyuyur. Gülməmmədova Ballı Qurban qızının (1909-1979) qəbri isə əhəng daşından hazırlanmış səliqəli, kirilcə yazılmış qəbri ilə seçilir. Novruzov Malagedən Qurban oğlu (1901-1987), Leyli Pirqulu qızının (1912-1986), Əfəndiyeva Balaqız Alı qızının (1886-1975) oğlu Əziz tərəfindən qoyulmuş qəbri, Məmmədova Güllü Müftü qızı, Mehdixanov Məhərrəm Mehdixan oğlu (186...-197...), Əliyev Məmməd Qəhrəman oğlu (1900-198..), İsmayılov Səməd Səyad oğlu (1900-1976), İsmayılova Rəmziyə Xoylu qızı, Mehdixanova Zöhrə ..... qızı (1898-1968) da daxil olmaqla bir sıra qəbrlərin yuxarı hissəsində vurulmuş şəkillərin çıxarıldığı görünür. Piriyev Əsgər Zirəddin oğlunun (1928-1974) qəbrinin üzərində bayatı (Eləmi qan ağlaram, Duraram dan ağlaram, Ürəkdə arzum getdi, Yenə də qan ağlaram) təsvir olunub.

        Gölkənd kəndi Qaraqoyunlu elinin kəndlərindən biri olaraq Ermənistan SSR-in Mixaylovka – Çəmbərək (Krasnoselo-Qırmızıkənd) rayonunda, rayon mərkəzindən 16 km şimal-qərbdə, Tərsəçay sahilində meşə ilə örtülü səfalı bir yerdə azərbaycanlılar yaşamış kənddir. Gölkənd kəndindəki son azərbaycanlılar 1988-ci ildə faciəli olaylar zamanı kənddən bütünlüklə qovulmuş və orada ermənilər məskunlaşdırılmışdır. Kəndin adı 1991-ci ildə "Ayqut" olaraq dəyişdirilmişdir. Şəmkir rayonu Çardaqlı kəndindən köçürülən ermənilər bu kənddə məskunlaşıblar.

     Hazırda  Göyçə mahalının da daxil olduğu Geğarkunik marzına daxildir.